Tyson Fury presion Seferit: Nuk e ke idenë kë ke përballë, s’ke asnjë shans

Më 9 qershor në Manchester do të zhvillohet dueli i madh mes të rikthyerit Tyson Fury (25 fitore e asnjë humbje në karrierë) dhe shqiptarit Sefer Seferi. Kjo sfidë pritet të dhurojë spektakël edhe pse ish-kampioni i botës në peshat e rënda do të duelojë pas dy vitesh e gjysmë pushim. Fury është i pamposhtur në ring dhe do të kërkojë që të mbetet i tillë edhe pas duelit me Seferin. Për më tepër, që Seferi është 10 vjet më i madh në moshë, një rival që vjen nga pesha “cruiserweight” (23 fitore e 1 humbje për shqiptarin).“Mezi po pres që të dueloj në ring. Jam rikthyer pasi e di që unë e kam këtu vendin tim, në ring. Unë e di se kush jam, nga vij, ku kam qenë më parë dhe e di se cila do të jetë e ardhmja ime”, u shpreh Tyson Fury për fansat gjatë një stërvitje të hapur sot në Manchester. Më tej, ish-kampioni i botës shtoi: “Seferi nuk ka aspak idenë se kë ka përballë kur thotë se do të më mundë. As Wladimir nuk më qëlloi një herë në fytyrë, ndaj as Seferi nuk do ta ketë atë shans. Do të dhuroj spektakël në ring, do të argëtoheni”.