Anthony Joshua mundi me KO në raundin e shtatë rusin Alexander Povetkin dhe vazhdon të jetë kampion bote i pamposhtur në peshat e rënda. Boksieri britanik pas fitores u shpreh se takimi i radhës do të ishte në prill dhe se nuk e kishte përcaktuar kundërshtarin, por gjatë 2019 u shpreh se do të përballej me amerikanin Deontay Wilder që është kampion bote në këtë divizion, duke harruar të përmendë ish-kampionin e botës Tyson Fury.
Ndërkohë që, Wilder e Fury do të kryqëzojnë dorezat më 1 dhjetor të këtij viti në Los Anxhelos, me britanikun që ka shansin të rikthehet kampion bote dhe i jep mundësinë të duelojë ai me Joshua.
“Pas kësaj deklarate të Joshua është e ndershme të them se Joshua dhe stafi i tij nuk kanë më asnjë shans që të duelojnë me mua, pasi unë të rikthehem kampion bote. Ata thanë se nëse nuk do të jetë Wilder rivali i radhës, atëherë do të duelojnë ndaj Dillian White, duke mos e përmendur aspak emrin tim, që jam kampioni i pamposhtur i botës. Ai nuk pranon të duelojë me mua, por dëshiron të përballet me boksierë 39-vjeçare dhe me gjysmën e gjatësisë së tij”, shkruan Tyson Fury në rrjetet sociale.
Më tej, Fury shton: “Sot kuptohet qartë se unë do të dueloj më 1 dhjetor ndaj boksierit më të mirë të botës në peshën e rëndë, Deontay Wilder, ndërsa Joshua as që nuk na afrohet. Ai është i avashtë. Nuk e mohoj që është i fuqishëm, por është shumë e qartë që ai po përpiqet të evitojë përballjen me mua me çdo kusht. Nëse do të isha Joshua do ta evitoja një përballje me mua, pasi me një grusht në fytyrë do ta hidhja “bum” në tapet. Ky nuk është një sport për ty. Nuk kam parë kurrë një dështim më të madh se ty në jetën time”.
Pas këtij reagimi të ashpër nga Fury, Joshua duket se ka kërkuar që të kontaktojë me patriotin e tij, por në momentin që ka klikuar në Twitterin e tij rezulton i bllokuar. Fury i ka bërë ‘block’ kampionit të botës në rrjetet sociale, pasi duket që nuk e kapërdinë dot suksesin e tij. Ndërsa Joshua tallet me duke shkruar: “Pse kaq serioz?” dhe pyetjen e shoqëron me një emoji klouni.
