Ministri turk i Transportit, Adil Karaismailoglu është shprehur se Turqia po planifikon të rikthejë fluturimet ndërkombëtare me rreth 40 shtete brenda muajit qershor.
Ai tha se vendi deri më tani ka arritur marrëveshje preliminare me 15 shtete. Ndërkohë, fluturimet e brendshme janë rikthyer të hënën në disa provinca, teksa Ankaraja ka lehtësuar kufizimet pas rënies së numrit të të infektuarve.
Sipas ministrit, fluturimet do të rikthehen në pesë faza në muajin qershor, ndërsa shtoi se Turqia është duke zhvilluar bisedime me 92 shtete për rikthim të udhëtimeve në mënyrë të sigurt.
“Ne besojmë se kemi lënë mbrapa një pikë të rëndësishme në betejën kundër virusit global. Tani duhet të vazhdojmë lidhjet tona globale ashtu sikurse tregtinë”, tha ai në një deklaratë.
Turqia renditet në mesin e 10 vendeve më të prekura nga koronavirusi në botë, duke regjistruar më shumë 166 mijë raste infektimi dhe 4,609 viktima.
