Turqia duket se po përballet me një valë të dytë të pandemisë së koronavirusit.
Ministri turk i Shëndetësisë, Fahrettin Koca, shprehet se kjo situatë vjen si pasojë e “pakujdesisë” në dasma dhe organizime të tjera.
Në një prononcim pas takimit që pati me ekipin e tij për koronavirus, Koca tha se Ankaraja, ka regjistruar rritjen më të madhe të shifrave të infektimit në ditët e fundit.
Sipas tij, mbi 29 mijë punëtorë shëndetësorë kanë qenë në kontakt me virusin deri më tani, ndërsa 52 prej tyre kanë ndërruar jetë.
“Shpërthimi është duke vazhduar. Virusi është duke u përhapur te më shumë njerëz çdo ditë. Numri ynë i testeve po rritet çdo ditë, numri i pacientëve të rinj nuk po bie”, tha ministri.
Numri i personave të prekur nga COVID-19 në Turqi është rritur për 1.596 raste në 24 orët e fundit. Deri më tani, Turqia ka regjistruar 273.301 raste me koronavirus dhe 6.462 viktima.
