Rama ka vizituar sot një familje që ka pësuar dëme të konsiderueshme në Gjorm të Laçit. Gjatë vizitës, Rama shkëmbeu shumë batuta, ndërsa premtoi se në festat e fundvitit tjetër, të gjitha familjet që janë prekur nga tërmeti do të jenë në shtëpi të reja.
“Dua të uroj gëzuar Krishtlindjen të gjithëve, pa dallim feje se i festojmë të gjithë. Edhe Krishtlindjet, edhe Bajramin e festojmë të gjithë. Një urim sidomos për të prekurit nga tërmeti. Vitin tjetër Krishtlindjet iu gjejnë në shtëpinë e re. Do të ngrihen komplekse, me projekt, ku do të strehohen të gjithë ata që janë prekur nga tërmeti. Do të bëhet Laçi qytet mjaft interesant”, tha Rama.
Gjatë bisedës me kryefamiljarin, Rama ka zbuluar dhe detaje nga projekti i Turqisë për të ndërtuar 500 banesa. Kryeministri tha se Turqia “ka marrë përsipër Laçin”, dhe tregoi disa fotografi nga telefoni i tij ku do të bazohet arkitektura e banesave të reja.
“Do të jenë tradicionale, me referenca nga Berati e Gjirokastra”, tha Rama. “E bën një qytezë fantastike dhe ka potencial për t’i bërë pak më të larta. Plus që është pjesa e spitalit që do të prishen të gjitha konviktet, dhe aty kemi për të bërë një projekt tjetër dhe shumë bukur do të dalë. Kështu që do bëhet Laçi, një qytet interesant”, u shpreh kryeministri.
