Kryeministri grek, Aleksis Tsipras ka dhënë mesazhe të qarta Shqipërisë dhe Maqedonisë për hapjen e negociatave me BE-në. Tsipras sqaroi se negociata dypalëshe mes shtetit të tij janë në zhvillim e sipër, por la të kuptohet se nga mënyra si do zhvillohen këto negociata do ndikoje drejtpërdrejtë në hapjen apo jo të negociatave më BE-në.
Rekomandimet e BE-së janë të qarta, asnjë vend i Ballkanit Perëndimor nuk integrohet nëse ka probleme me fqinjët. Shqipëria është në negociata me Greqinë për çështjen e detit. Marrëveshja e parë e 2009 u hodh poshtë nga Gjykata Kushtetuese e Shqipërisë. Aktualisht ministri i Jashtëm, Ditmir Bushati dhe ekipi i tij negociator kanë marrë plotfuqishmërinë nga presidenti Meta për negociatat me Greqinë.
“Qëndrimi ynë është konstant. Hapja e negociatave për anëtarësim me këto dy vende do të jetë e mundur vetëm nëse do të përmbushen gjithë kushtet dhe kriteret e dakorduara nga Këshilli i Bashkimit Evropian”, deklaroi kryeministri grek Tsipras në takimin homologët e tij në samitin e Bashkimit Evropian, mbi negociatat që Greqia po zhvillon me Shqipërinë dhe Maqedoninë.
Kjo deklaratë është e qartë që Tsipras kërkon të përfitojë sa më shumë nga këto negociatat dhe nëse del i pakënaqur mund të përdorë veton si shtet duke bllokuar hapjen e negociatave për Shqipërinë.
Kryeministri grek theksoi se do të jetë një ngjarje shumë e rëndësishme samiti i Sofies për Ballkanin perëndimor që do të mbahet në muajin maj, ndërsa shtoi se edhe në samitin e radhës të qershorit, do të diskutohet për zgjerimin e BE-së.
