Teksa pak orë na ndajnë nga ndërrimi i viteve, amvisat shqiptare janë drejt përfundimit të gatimeve. Por, si çdo vit tjetër edhe këtë fundvit ato ankohen për çmimet e larta. Ata shprehen për Tirana Today se me të ardhurat që marrin, e kanë shumë të vështirë të përballojnë çmimet e produkteve për tryezën e Vitit të Ri. Teksa kryesisht rritje kanë pësuar frutat dhe perimet, qytetarët thonë shpenzimet për vetëm një natë janë të shumta.
“Çmimet janë pak të shtrenjta, për jetesën dhe pagesat që kemi. Për mos të llogaritur ëmbëlsirat si bakllavaja, pijet, dhuratat për fëmijët. Dhe vetëm darka sonte na ka shkuar më shumë se 100 mijë lekë të vjetra.”
“Tani të blesh një pulë deti apo një kaposh, të ikin pa frikë më shumë se 50 mijë lekë. Pa llogaritur produktet e tjera të cilat janë të domosdoshme për tu pasur në tavolinë. Dhe kështu të shkon tavolina mbi 250 mijë lekë të vjetra. I thonë afro një rrogë për vetëm një natë.”
“Gjithmonë kur vijnë festat, çmimet janë diçka më shtrenjtë. Dhe neve na mbetet vetëm të kursehemi gjatë vitit, për të pasur mundësi që t’ia plotësojmë gjithë dëshirat fëmijëve. Por, çmimet e çdo produkti janë ngritur. Madje edhe qepët, po shihja që ishin më shtrenjtë se zakonisht.”
“Çmimet sa vijnë edhe rriten, rrogat janë shumë të ulëta, varfëria është shtuar më shumë. Ka njerëz që nuk janë në punë fare dhe nuk kanë asnjë lloj të ardhure. Kështu i bie që ai nuk feston fare. Ndërkohë ne që jemi më mesatar, edhe pse kemi pak më tepër mundësi, përsëri na duhet të shtrëngohemi. Ndaj unë i uroj gjithë shqiptarëve të kenë shëndet, por edhe t’i rregullohet ekonomia.”
Ndërkohë çmimet e larta kanë prekur edhe pensionistët. Këta të fundit thonë për Tirana Today, se i duhet të harxhojnë pjesën më të madhe të pensionit vetëm për të blerë produktet e tryezës për Vitin e Ri.
“Janë të shtrenjta gjërat, sidomos për pensionin që marrim ne. Na shkoi darka më shumë se 80 mijë lekë të vjetra. Por, çfarë të bëjmë, do festojmë se vijnë edhe fëmijët.”
“Edhe për një familje mesatare është pak e vështirë të përballojë tryezën e Vitit të Ri. Kjo pasi çmimet janë të shtrenjta, na lanë përtokë. Veçanërisht tani në fundvit, që rriten akoma dhe më tepër.” / TIRANA TODAY
