Presidenti i SHBA, Donald Trump nuk ka dërguar asnjë mesazh urimi për presidentin e rizgjedhur të Rusisë, Vladimir Putin.
Pas mungesës së një mesazhiu urimi nga ana e SHBA-ve, Kremlini ka dalë me një reagim. Ai tha se mungesa e mesazhit të urimit të presidentit amerikan, Donald Trump, për rizgjedhjen e Vladimir Putinit president i Rusisë “nuk është hap jomiqësor”.
Zëdhënësi Dmitry Peskov u tha gazetarëve të martën, dy ditë pas zgjedhjeve në Rusi, se ai nuk e konsideron heshtjen e Trumpit “veprim jomiqësor”.
“Disa mund të mos bëjnë telefonata për shkak të agjendës së ngjeshur, disa për arsye të tjera”, tha Peskov, raporton Rel.
Në kohën kur marrëdhëniet SHBA-Rusi janë në nivelin më të ulët që nga Lufta e Ftohtë, Peskov tha se “Putin mbetet i hapur për normalizimin e marrëdhënieve me partnerët amerikanë”.
Shtëpia e Bardhë ka thënë të hënën se “nuk është e befasuar nga rezultati i zgjedhjeve” në Rusi.
Putin, i cili ka qenë herë president, herë kryeministër i Rusisë qysh në vitin 1999, ka fituar mbi 76 përqind të votave.
Vëzhguesit ndërkombëtarë i kanë kritikuar zgjedhjet, duke thënë se ka pasur mashtrime, presion për të votuar dhe mungesë të “zgjedhjes reale”.
