Tropojani Ukë Idriz Çelkolaj i ka besuar kryebashkiakut Veliaj dhe ka prishur vetë banesën e ndërtuar pa leje. Ai mbajti fjalën e dhënë Veliajt, duke pranuar që dy objektet i tij, të ndërtuara pa leje në gjurmën e Unazës së Madhe, të prishen nga Inspektorati i Mbrojtjes së Territorit, duke i hapur rrugë vijimit të punës për realizimin e këtij projekti.
Uka ka qenë i pranishëm gjatë momentit të prishjes së ndërtesave. Më tej, ai bëri thirrje për banorët e tjerë, teksa tha se ka ardhur koha që të mos bëhen më pengesë e zhvillimit të këtij segmenti të Unazës dhe i gjithë Tiranës.
“I dhashë fjalën kryetarit si burrat dhe e mbajta fjalën. I prisha vetë këto dhe jam shumë i predispozuar që të zhvillohet Tirana, se po të jetë mirë Tirana do të jemi mirë ne të gjithë.
S’kemi arsye të dalim kundër projektit, kundër zhvillimit përderisa kjo është për të mirën e gjithë komunitetit dhe gjithë banorëve në Tiranë dhe gjithë Shqipërisë. Kjo është e vetmja mënyrë që mund të vazhdojmë të punojmë dhe të zhvillohet Tirana. Ky është mesazh për të gjithë njerëzit të ndërgjegjësohen, të mos pengojnë zhvillimin e Tiranës. Ky është mesazh për të gjithë sepse është e mirë e të gjithë neve”, theksoi Ukë Idriz Çelkolaj.
Ukë Idriz Çelkolaj ishte pjesë e një përfaqësie të zgjeruar të banorëve të zonës së Astirit që dy ditë më parë u takuan me kryebashkiakun Erion Veliaj, ku diskutuan mbi mundësitë që rruga të bëhet dhe që familjet që preken nga ky projekt të mund të përfitojnë nga projektet sociale të Bashkisë Tiranë, ku përfshihen sistemimi në banesa sociale që mund t’i përdorin pa afat, apo edhe dhënia e bonusit të qirasë për 3 vite.
