Vjeshta pritet me ndryshime në administratë, pasi tre nga drejtuesit më të rëndësishëm pritet të largohen. Gjatë muajve shtator-tetor, priten ndryshime rrënjësore. Ka qenë kryeministri Rama i cili ka paralajmëruar për ndryshime të rëndësishme në Qeveri, me disa ministra që e shohin veten tashmë të rrezikuar për t’u larguar. Por ndryshimi i ministrave do të sjellë edhe largimin e disa prej drejtuesve të rëndësishëm të administratës.
Politiko.al mëson se lëvizjet do të prekin Drejtorinë e Përgjithshme të Doganave dhe Drejtorinë e Përgjithshme e Shërbimeve të Transportit Rrugor (DPSHTRR), ndërkohë që ndryshime pritet të ketë edhe në Drejtorinë e Përgjithshme të Tatimeve.
Belinda Ikonomi u emërua në krye të Doganave në shtator të 2016-ës, dhe përgjatë dy viteve ajo ka mbajtur një profil të ulët publik. Largimi i saj pritet të ndodh këtë vjeshtë dhe ndonëse jo e konfirmuar zyrtarisht, Ikonomi përflitet se preferohet nga kryeministri Edi Rama për një post më të lartë. Ajo ka qenë më parë këshilltare e Ramës për ekonominë, si dhe ka patur pozicione në Bashkinë e Tiranës dhe Ministrinë e Kulturës, kur këto institucione janë drejtuar nga kreu i PS.
Arben Isaraj është një tjetër drejtues që pritet të largohet muajt e ardhshëm. Ai u emërua në krye të DPSHTRR në tetor të 2017-ës, por në vjeshtë edhe ky institucion mund të ketë një drejtues të ri.
Drejtoria e Përgjithshme e Tatimeve pritet gjithashtu që të mos i shpëtojë ndryshimeve të Ramës në administratë. Vasilika Vjero është emëruar në krye të Doganave në tetor të vitit 2016-të, por këtë detyrë nuk parashikohet ta mbajë edhe shumë gjatë. Po kështu është njoftuar për dorëheqjen e Enertil Canaj, drejtor i Hetimit Tatimor. (Burimi: Politiko.al)
