Regjisori Laert Vasili ka ndarë me të gjithë publikun një detaj interesant, kur ai është ndaluar nga policia greke, pasi kishte kënduar labçe. Ai deklaroi në emisionin “360 Gradë” në “Ora News”, se në Shqipëri ngado dëgjohet muzikë greke.
Por në Greqi situata është e nderë. Ai ka sjellë në fokus rastin kur kishte ditëlindjen. Së bashku me miqtë e tij kishin kënduar në shqip, por policia sapo ishte njoftuar për këtë gjest, menjëherë i kishte arrestuar.
“Dil ku të duash në kafeteritë e Tiranës, do të dëgjosh gjithandej muzikë greke. Provo në një kafe të Athinës të vësh muzikë shqiptare. Në një ditëlindje time, me 3-4 vlonjatë që jam rritur me ta, filluam të këndojmë labçe. Erdhi policia dhe na arrestoi.
Është një shtet që deklaron se jemi 100% të pastër. Kur ministrja e Jashtme Dora Bakojani deklaroi në Parlamentin Evropian se jemi 100% të pastër, Parlamenti Evropian qeshi.
Le të marrim zonën e minoritetit, se sa mbiemra janë sllavë dhe sot marrin pension. Në qoftë se Shqipëria do të ishte Zvicër, shumë anëtarë të minoritetit do të deklaroheshin zviceran. Fukarallëku është maskarallëk”.
