Gazetarja e njohur investigative Klodiana Lala, është e mendimit se policia është e pafuqishme ndaj krimit. Duke qëndruar në të njëjtën linjë, ajo e ka cilësuar operacionin “Forca e Ligjit” thuajse të dështuar deri tani.
Në një intervistë për emisionin “Kjo Javë”, gazetarja tha se pavarësisht ndërhyrjeve të herëpashershme, deri tani nuk është parë pas hekurave asnjë kriminel i fuqishëm. Ajo tha më tej se nga operacioni “Forca e ligjit” priteshin arrestime të bujshme të personazheve me rrezikshmëri të lartë, që kanë kryer vrasje mafioze apo krime të rënda. Por deri më tani, ky operacion nuk ka dhënë aspak rezultatet e duhura.
“Deri tani nuk kam parë asnjë kriminel të fuqishëm prapa hekurave, e të japë llogari. Nga “Forca e Ligjit” priteshin arrestime të bujshme të personazheve me rrezikshmëri të lartë, që kanë kryer vrasje mafioze, apo krime të rënda.
Deri më tani e them me bindje se “Forca e Ligjit” nuk ka dhënë rezultatet e pritshme. Për mendimin tim si gazetare, policia shqiptare është e fjetur, apatike dhe e pafuqishme ndaj krimit”, u shpreh gazetarja.
