Java e fundit e ish-futbollistit të Atletico Madrid dhe Barcelonës, Arda Turan ka qenë e mbushur me skandale dhe sherre. Futbollist i nivelit botëror tashmë rrezikon që të dënohet me disa vite burg.
Mesfushori i huazuar nga Barcelona te Bashakshehiri në Turqi është në qendër të vëmendjes për arsyen e gabuar. Para pak ditësh futbollisti i kombëtares turke u përfshi në një konflikt me një këngëtar turk, Berkaj Shahin, të cilit i ngacmoi bashkëshorten. Sherri në një klub nate degjeneroi në dhunë fizike, ndërsa më pas Arda shkoi i armatosur në spital, ku debatoi sërish me Berkaj duke qëlluar një herë drejt dyshemesë.
Tani Arda Turan ka mësuar akuzat që rëndojnë ndaj tij: ngacmim seksual, armëmbajtje pa leje dhe dhunë fizike. Edhe Berkaj rrezikon 2 vite burg.
Shpresa e Turan është që të përfitojë nga statusi i tij prej futbollisti me më shumë se 100 ndeshje me kombëtaren, por mbi të gjitha nga fakti se është një mbështetës i deklaruar i presidentit Erdogan, duke dalë edhe në mitingjet e “sulltanit” turk.
Mesfushori mund të dënohet deri në 12 vite burg për akuzat e armbajtjes pa leje dhe sulmit seksual. Turku aktivizohet me Bashakshehirin në kampionatin vendas, por është i skualifikuar me 16 ndeshje që nga sezoni i shkuar.
