Studenti nigerian veterinar Samuel Otunla, si qindra studentë të tjerë ndërkombëtarë, ka mbetur i ngecur në qytetin verilindor të Ukrainës, Sumy, që nga shpërthimi i konfliktit. Civilët kanë filluar të ikin nga Sumy sot, pasi Rusia ra dakord të ndalonte bombardimet e saj.
Duke folur për BBC të hënën, Otunla tha se 10 ditët e fundit kishin qenë “asgjë më pak se trauma”.
Ai ka qenë një nga 60 studentët ndërkombëtarë, së bashku me ukrainasit dhe stafin e hostelit, të cilët kanë kaluar një javë “në një bodrum me pluhur”.
“Ne nuk kemi mundur të largohemi. Hekurudha është mbyllur, rrugët kryesore janë [kryesisht] të paarritshme”, tha ai.
“Gjatë tetë ditëve të fundit, ne kemi përjetuar trauma, sëmundje, stres dhe lodhje – por, në mes të gjithë kësaj, ne kemi përjetuar edhe miqësi dhe dashuri”.
“Ne kemi ndarë vakte, medikamente, batanije dhe dyshekë me njëri-tjetrin; kemi luajtur lojëra së bashku, jemi lutur së bashku dhe kemi qeshur së bashku. Por më shumë se çdo gjë, ne duam të evakuohemi së bashku”.
Burimi i lajmit: BBC. Përshtatur nga Tirana Today
