Rruga Transballkanike është kthyer në një rrugë ‘ferri’, ku do ditë po ndodhin aksidentet. Policia e Vlorës ka shtuar prezencën e policëve të qarkullimit në këtë rrugë, pasi çdo ditë po aksidentohen kalimtarë dhe po përplasen automjete.
Së fundmi dy njerëz ndodhen në gjendje të rëndë në spital dhe një i tretë ka humbur jetën pas një aksidenti. Devijimi i qarkullimit të automjeteve në rrugën Transballkanike ka ardhur për shkak të punimeve që janë duke u kryer në ndërtimin e Bulevardit Vlorë-Skelë.
Për ekspertët e qarkullimit, shkaqet nisin nga mungesa e semaforëve, mungesa e mbikalimeve, dhe ajo e sinjalistikës vertikale.
Që në fillim të vitit në këtë segment rrugor janë shënuar 23 aksidente me kalimtarë dhe drejtues të dëmtuar. Mbi 55 raste janë vetëm me dëme materiale. Për policinë e qarkullimit rrugor në Vlorë, Trasballkanikja është kthyer në prioritet.
Numri i lartë i aksidenteve ka ndikuar për instalim të shpeshtë të patrullave. Por pavarësisht kjo duket se nuk ka rezultate në ulje të ngjarjeve. Segmenti është nën juridiksionin e Drejtorisë së Përgjithshme të Rrugëve për shkak se është në hartën e rrugëve nacionale.
