Kroacia prek për herë të parë një finale Botërori dhe kjo është historike për ta. Të besuarit e Dalic do të zbresin në fushë, në sytë e gjithë botës për të arritur atë që askush nuk e kishte menduar në fillimin e kampionatit, madje as vetë ata, të shpallen kampionë bote. Zlatko Dalic para ndeshjes është shprehur se ai dhe lojtarët nuk kanë asnjë lloj presioni dhe se do argëtohen në këtë ndeshje. Po ashtu ka folur për gjendjen e ekipet dhe kundërshtarin, për ta mbyllur me disa fjalë se çfarë do të ndodhë nëse humbin apo fitojnë.
“Jemi shumë krenarë që shohim çmendurinë e vendit tonë. I kanë harruar të gjitha hallet. Fitojmë apo humbasim, nuk ka shumë rëndësi. Tifozët tanë janë të mrekullueshëm. Por na bën mirë të mendojmë 4 milionë njerëz duke festuar… Është finalja e Botërorit, është e thjeshtë. Lojtarët e dinë sa e rëndësishme është të luash një finale, por nëse ndonjëri prej lojtarëve nuk është gati, duhet të ma thotë. Kemi disa probleme fizike, por shpresoj që lojtarët e mi të jenë të përgatitur. Nëse jo, kam lojtarë të tjerë fantastikë në stol. Nuk ka asnjë problem”, shprehet Dalic.
Kroacia në këtë Botërorë nuk mund të themi se ka pasur lojtarë që ka bërë diferencën, ata kanë funksionuar më së miri si një grup i fortë, që sakrifikoheshin për shokët në çdo pjesë të fushës. “Kam një raport të shkëlqyer me lojtarët, i cili ngrihet mbi besimin dhe respektin. Ata e vlerësojnë rolin tim si marrës vendimesh. Kemi ardhur për të marrë rezultate. Unë gjithashtu i respektoj lojtarët e mi, flas me ta, jemi të gjithë bashkë dhe ata e dinë që unë jam miku i tyre. Jemi si një familje e madhe”.
Mandzukic ishte heroi përballë Anglisë me atë gol në minutën e 109’ bëri të mos ekzekutohen penalltitë. “Ai është një lojtar i madh dhe këtë e ka treguar gjatë karrierës me klubet dhe me trofetë që ka fituar. Unë i thashë që në fillim se do të ishte sulmues kryesor, sepse te Juventusi luan në një rol tjetër. Nuk kam pasur kurrë probleme me të. Është lojtari i parë që nis të mbrojë dhe bën një punë të shkëlqyer. Çdo ekip dhe çdo trajner do të donte ta kishte në skuadër”, shprehet Dalic.
Franca është një kundërshtarë mjaft i fortë dhe ka në përbërje shumë talente të cilët mund të bëjnë diferencën me një shans të vetëm. Por Dalic mendon se nuk është momenti që të shqetësohemi për kundërshtarin, por të mendojmë atë që do japim në fushë dhe të argëtohemi pasi jemi në finalen e Botërorit. “Nuk mendoj aspak në statistikat e së kaluarës. Është finalja e Botërorit dhe duhet ta shfrytëzojmë këtë moment. Nuk duhet të shqetësohemi aspak për rivalin. E rëndësishme është ajo që bëjmë ne. Duhet të argëtohemi. Në fund do të shihet se ekipi më i mirë do të fitojë.
Nuk ka asnjë lloj presioni për lojtarët e mi. E gjithë bota do të jetë duke i parë dhe ata duhet të dalin në fushën e lojës për të bërë futbollin e tyre, pa menduar për asgjë tjetër. Unë kam lojtarë që kanë luajtur finale Champions-i, por ky është një moment tjetër fantastik për kroatët. Duhet të tregojmë vlerat tona dhe cilësitë. Nëse do të fitojmë, do të jemi të lumtur, nëse do të humbasim, do të urojmë rivalin dhe do ta shijojmë këtë moment”, përfundon trajneri kroat.
