Klubi i Fiorentinës ka qenë një nga më të goditurit në Itali, me disa futbollistë e pjesëtarë të stafit që janë identifikuar si të infektuar me COVID-19. Të gjithë tashmë rezultojnë negativë, por ky infeksion do të ketë pasoja të mëdha në klub pasi këta lojtarë që janë ndeshur me të, e potencialisht ata që mund të përballen në të ardhmen me virusin, rrezikojnë seriozisht jetën.
Këtë e ka shpjeguar Giuseppe Iachini, trajneri i skuadrës së qytetit të Firences, duke paralajmëruar se rifillimi i aktiviteteve do të ishte shumë i ngadaltë dhe i kujdesshëm për futbollistët e tij.
“Rikthimi në stërvitje? Pikë së pari nuk do të ketë mënyrë që të stërvitesh si zakonisht, por duhet bërë me grupe shumë të vogla. Lojtarët që kanë pasur virusin, apo e kanë kaluar pa shenja, rezultojnë të shfaqin edhe disa problematika. Nuk do të mund të stërviten me ritme të larta, me intensitet si atletët. Është zbuluar se infeksioni prek venat, rrezikohet zemra e rrezikohet tromboza. Duhen bërë verifikime, kontrolle nëse mund të luajnë e tampone.
Tani po hap një temë se mendoj se do të krijohen shumë probleme. Do të duhet të stërviten maksimumi tre lojtarë bashkë, qendrat sportive duhet të kenë më shumë dhoma, duke mbajtur maksimumi tre atletë në dhomat e zhveshjeve. Nuk e di se sa janë me këto karakteristika në Itali. Pastaj lojtarët dhe stafi duhet të qëndrojnë të izoluar në hotel për 45 ditë, pa mundësinë që ndonjë të hyjë apo të dalë, ndërsa shkohet në fushë me një autobus të dezinfektuar. Kjo është mënrya se si duhet vepruar në javët e para.
Skuadrat e Veriut të Italisë nuk do të mund të qëndrojnë në qendrat e tyre sportive, duhet të transferohen, duhet të gjehen stadiume për të luajtur ndeshjet e tyre. Këto çështje i takojnë personave të tjerë, por nuk mendoj se jemi në kushtet e stërvitjes ideale”, tha ai duke zbuluar problemet me të cilat përballej klubi i tij në këtë moment.
