Nuk duronte dot faktin që i kishin arrestuar të dashurin 43-vjeçar, të martuar dhe me fëmijë, që një vajzë e mitur të ndërmerrte aktin tragjik. 14-vjeçarja ka kryer vetëvrasje, duke u hedhur në linjën hekurudhore elektrike. Ngjarja e rëndë është shënuar dy ditë më parë në Athinë. Katër automjete që i përkisnin zjarrfikësve lokalë, nxituan në stacion për të ndihmuar vajzën, por për fat të keq ajo ndërroi jetë në vend.
Mediat greke të cilat raportojnë lajmin, shkruajnë se e mitura kishte lënë një shënim ku shpjegonte arsyet e aktit të vetëvrasjes. Prej 3 muajsh, e ndjera ishte në një lidhje me një 43 vjeçar të martuar dhe me fëmijë, pronari i një dyqani ushqimor në zonën ku jetonte vajza.
Familja e saj ishte vënë në dijeni për historinë e vajzës, dhe kishte bërë kallëzim në polici për ngjarjen.
Pas denoncimit, 43-vjeçari u vu në pranga. Në shënimin e lënë para se të ndërmerrte aktin ekstrem, vajza kishte shkruar se nuk e përballonte dot faktin që ai ishte në burg.
Sipas mediave greke, burrit i janë gjetur edhe materiale kompromentuese, të cilat tregojnë se ka pasur raport seksual me të miturën.
