Gjykata në Kroaci ka lënë në burg shoferin që shkaktoi tragjedinë shqiptare me 10 të vdekur. Gjykata në Kroaci ka vendosur një muaj paraburgim për shoferin e autobusit që shkaktoi tragjedinë shqiptare, ku humbën jetën 10 persona. “Shoferi ishte i lodhur momentin që humbi kontrollin e autobusit, dhe i paaftë për ta drejtuar në mënyrë të sigurt”, bëjnë me dije autoritetet kroate.
“Gjyqtari urdhëroi paraburgimin për një muaj, për shkak të mundësisë së mundshme të largimit nga Republika e Kroacisë, pra arratisjes. Sot ai nuk dha asnjë dëshmi”, tha më tej avokati.
Aksidenti i rëndë u shënua në qytetin Slavonski Brod, rreth orës 06:20 të mëngjesit, ndërsa autobusi me targa të Kosovës vinte nga Frankfurti, Gjermani, drejt Prishtinës, ndërsa në bord kishte 67 pasagjerë dhe dy shoferë, ku njëri humbi jetën në aksident.
Viktima u identifikua si Naser Sylmetaj, ndërsa vetëm 30 minuta para aksidentit, ai u largua nga timoni, për t’ja lënë vendin shoferit tjetër. Shefi i Policisë Rrugore të Stacionit Policor Slavonski Brod, Franjo Galiç ishte i pari që shkoi në vendin e ngjarjes, ndërsa aksidentin e përshkroi si më të rëndin që kishte parë ndonjëherë.
