Të paktën 14 emigrantë kanë vdekur në ujërat e Bangladeshit, pasi varka me të cilën po lundronin është mbytur. Lajmi është raportuar nga BBC, sipas të cilës, midis të vdekurve ka fëmijë edhe gra.
Viktimat mësohet se i përkasin komunitetit Rohingya. Sipas autoriteteve në varkë kanë qenë mbi 100 persona. Sipas “AFP” 70 prej personave janë shpëtuar, ndërkohë që ka ende shumë raportime për të zhdukur. Barka u përmbyt në Gjirin e Bengalit, afër ishullit të Shën Martinit.
Në gusht të vitit 2017, aksionet e dhunshme të ushtrisë birmandeze ndaj myslimanëve të komunitetit Rohingya i detyruan qindra mijëra pjesëtarë të këtij grupi që të ikin drejt Bangladeshit.
Shumica janë vendosur në kampe të refugjatëve dhe një pjesë është përpjekur të largohet përmes barkave edhe në Malajzi.
