Shqiptarët janë sërish të përfshirë në trafikun e drogës. Kësaj here marjuana nuk vjen më nga Shqipëria por nga Spanja. Në një operacion të policisë italiane të koduar “Cargo” janë arrestuar tre shqiptarë, një spanjoll dhe një maroken. Në operacion u sekuestruan rreth 110 kg marijuanë me një vlerë në treg prej më shumë se një milion euro.
Policia italiane arrestoi shtetasit; Vital Meço, 43 vjeç, banues në Cento; Tonin Bibaj, 33 vjeç dhe Alfred Gjoka, 36 vjeç, (në shtëpinë e tij u gjetën gjithashtu 70 gram hashash), rezidentë në zonën e Savonës (Alassio dhe Andora).
Karabinierët kishin prej kohësh nën vëzhgim një grup kriminal që vepronte në Ferrara. Droga u gjet në një kapanon të braktisur në rrugën “Marconi” në Ferrara. Dërgesa vinte nga Spanja me një kamion që transportonte fruta perime me destinacion tregun e Italisë së veriut.
https://www.facebook.com/tiranatodaycom/videos/364983587279718/
Gjithashtu, në këtë operacion janë arrestuar, transportuesi spanjoll – Joaqiun Martinez, 37 vjeç dhe një shtetas maroken, Nour Eddine Benazzi, 43 vjeç.
Akuzat për ta janë për trafik ndërkombëtar të drogës, për Meçon edhe posedim droge me qëllim shpërndarjen: në shtëpinë e tij ai mbante 280 gramë kokainë dhe kishte gjithçka që duhej për ta shpërndarë. Të gjithë përveç Gjokës që ka precedentë specifikë janë të padënuar. Të pesë të arrestuarit janë të gjithë në burg, dhe mes të enjtes dhe të premtes do të ketë një seancë dëgjimore për vlerësimin e masës.
Të gjithë të arrestuarit, lëvizjet e tyre dhe operacioni janë filmuar nga kamerat e survejimit por edhe nga kamerat e përgjimit të policisë italiane.
