Kreu i Partisë Demokratike, Lulzim Basha theksoi se në ditët në vazhdim do të dalin skandale dhe fakte të tjera që tregojnë përfshirjen e kryeministrit Edi Rama dhe qeveritarëve të tjerë në aktivitete kriminale.
Duke iu referuar rastit të ish-ministrit të Brendshëm, Saimir Tahiri që po hetohet nga prokuroria, kreu i opozitës tha se presionet e vazhdueshme të kryeministrit dhe Tahirit ndaj organit të akuzës nuk kanë dhënë asnjë rezultat. Ndërsa e cilësoi Ramën si avokatin e ish-ministrit të Brendshëm. Sipas Bashës, tashmë kreun e qeverisë e ka kapur paniku duke qenë se fakte të reja do të dalin në dritë.
“Sot Rama dhe Tahiri janë në panik dhe kanë humbur çdo kontroll ndaj së vërtetës. Ditët e ardhshme do të ketë të tjera skandale dhe të vërteta të tjera që tregojnë përfshirjen e kryeministrit Rama dhe qeveritarëve të tij në aktivitete kriminale”, u shpreh Basha në një konferencë për mediat.
https://www.facebook.com/lulzimbasha.al/videos/1673432329374608/
Fjala e Bashës:
Përgjimet e antimafies italiane tregojnë se Dritan Zagani kishte të drejtë. Me gjithë presionin e madh që Edi Rama dhe Saimir Tahiri po bëjnë ndaj prokurorisë dhe gjyqësorit, këto nuk dhënë asnjë rezultat.
Ata që montuan akuzat ndaj Zaganit duhet të çohen përballë drejtësisë. Rama nuk është më kryeministër, por është avokat i Tahirit. Ai po merret me mbrojtjen e krimit dhe asgjë tjetër. Po bën avokatin e Tahirit, duke bredhur studio më studio, pasi kështu mbron veten e tij.
Sot Rama dhe Tahiri janë në panik dhe kanë humbur çdo kontroll ndaj së vërtetës. Ditët e ardhshme do të ketë të skandale dhe të vërteta të tjera që tregojnë përfshirjen e kryeministrit Rama dhe qeveritarëve të tij në aktivitete kriminale.
Dua të përshëndes deklaratën e PPE-së, pasi tashmë qëndrimi evropian dhe amerikan është i qartë. Mbështetja e tyre ndaj prokurorëve dhe gjyqtarëve që po hetojnë qeveritarët shqiptarë është krejt e dukshme. Opozita është në shqyrtim të çdo prove apo materiali që tregon për lidhjen e pushtetarëve me trafikantët e drogës. PD po harton dhe përpunon informacione të lidhjes së politikës me krimin dhe do ta bëjë më çdo forcë politike që është pjesë e frontit opozitar. Opozita do të jetë në ballë të transparencës totale.
