Para pak ditësh, Ministri i Brendshëm Fatmir Xhafaj, u zotua se këtë vit do të ketë zero kultivim kanabisi. Teksa bëhet një “luftë” e përditshme ndaj trafikantëve, në Australi janë zbuluar ferma kanabisi, ku shumica drejtohen nga grupet kriminale shqiptare. Mësohet se autoritetet atje kanë prangosur pesë persona, të cilët ishin pjesë e një rrjeti të mirëorganizuar krimi.
Gjithashtu nëpër këto ferma kultivimi të kanabisit në Sydney, ata sekuestruan më shumë se 2.200 rrënjë kanabis, vlera e të cilave në treg do të sillte një përfitim prej 6.2 milionë dollarë australian. Ajo çfarë të bënte përshtypje lidhet me faktin se shumica e fermave të kanabisit, drejtohen nga grupet kriminale shqiptare dhe vietnameze.
Ata, sipas policisë, i përdorin paratë që përfitojnë nga këto shtëpi, për të financuar të tjera biznese të jashtëligjshme, siç është trafikimi i metamfetaminës, heroinës dhe kokainës.
Mediat australiane japin alarmin, ndërsa shkruajnë se bandat përdorin dokumente false, në mënyrë që të marrin me qira shtëpitë, ku do të shtrihet i gjithë aktiviteti ilegal. Inspektori Stuart Bell ka thënë se shtëpitë me kanabis janë potencial për të vënë shtëpitë e tjera dhe njerëzit që i rrethojnë në rrezik.
“Mos harroni, ky është krim i organizuar. Ata që përfshihen, duan vetëm të përfitojnë pavarësisht gjithçkaje. Ne duam të shkatërrojmë çdo aspekt të veprimit të tyre, jo vetëm duke u prishur infrastrukturën, por edhe t’i largojmë kriminelët nga rrugët. Shtëpitë me kanabis janë potencial për të vënë shtëpitë e tjera dhe njerëzit që i rrethojnë në rrezik”, tha inspektori Stuart Bell.
