Prokuroria e Krimeve të Rënda po kërkon informacion nga vendet e huaja për të arrestuarit që lidhen drejtpërdrejt me çështjen e gjetjes së 3.4 milionë eurove në dy mjete Toyota Yaris.
Prokurori ka dërguar letërporosi në Gjermani, Belgjikë dhe Angli, nga ku pritet të merret informacion i detajuar, në lidhje me aktivitetin e katër shtetasve që mbahen të arrestuar për këtë çështje.
Letërporosia në Angli është dërguar për Edi Likën, pasi dyshohet se ka të dhëna se është marrë me trafik kokaine.
Kujtojmë se para disa ditësh u gjetën plot 3.4 milionë euro në dy mjete Toyota, që futeshin për herë të parë në Shqipëri.
Para burojnë nga trafikimi i lëndëve narkotike dhe po futeshin në të zezë në Shqipëri, ndërsa përveç 4 të arrestuarve, janë shpallur në kërkim edhe dy shtetas të tjerë, që mund të jenë pronarët e vërtetë të parave.
