Bota

Toyota do ndërtojë qytetin “e zgjuar”, për të testuar makinat që drejtohen vetë


               Publikuar në : 13:38 - 13/01/20 B H

Nga Oscar Holland “CNN”

Kompania e njohur japoneze e prodhimit të automjeteve, Tojota, ka bërë publike planet e saj për të ndërtuar një “qytet të së ardhmes” që do të banohet nga 2.000 njerëz, dhe ku do të testohen automjetet autonome, teknologjia inteligjente dhe jetesa e ndihmuar nga robotët.

Projekti ambicioz i quajtur “Woven City”, do të nisë të zbatohet pranë malit Fuxhi, rreth 96 km Tokios. Duke e prezantuar projektin në panairin Consumer Electronics Show (CES) në Las Vegas, shefi ekzekutiv i Toyota Akio Tojoda, e cilësoi qytetin e ri si një “laborator të gjallë”, që do t’i japë mundësi studiuesve, shkencëtarëve dhe inxhinierëve të testojnë teknologjinë në zhvillim në një “mjedis të jetës reale”.

“Me godinat, njerëzit dhe automjetet, që do jenë të lidhur dhe komunikojnë me njëri-tjetrin përmes të dhënave dhe sensorëve, ne do të jemi në gjendje të testojmë teknologjinë e Inteligjencës Artificiale, në botën virtuale dhe atë fizike, duke e maksimizuar potencialin e saj”, tha ai gjatë prezantimit.

“Ne duam ta shndërrojmë inteligjencën artificiale, në një inteligjencë të amplifikuar”, shtoi Tojoda. Qyteti i ri, do të vendoset në një hapësirë prej 175 hektarësh, ku më herët ndodhej një nga fabrikat e Toyota. Duke e përshkruar qytetin si “tërësisht të qëndrueshëm”, kompania tha se projekti do të mundësohet nga karburanti i hidrogjenit dhe paneleve diellore në çati.

Në rrugët e këtij qyteti, do të lejohen vetëm makinat plotësisht autonome, që nuk emetojnë asnjë sasi karboni në atmosferë. Një flotë automjetesh vetë-drejtuese të njohura si Toyota e-Palettes, do të përdoren për shpërndarjen e sendeve të ndryshme, dhe për shitjet me pakicë.

Pas hapjes, Woven City pritet të jetë shtëpia e rreth 2.000 njerëzve. Banorët e parë do të jenë punonjësit e kompanisë dhe familjet e tyre, por edhe pensionistët, shitësit me pakicë, studiuesit dhe partnerët e tjerë të projektit.

Projekti, është një bashkëpunim midis kompanisë japoneze dhe studios arkitekturore daneze Bjarke Ingels Group (BIG), që hartoi master-planin e qytetit të ri. Godinat do të jenë kryesisht prej druri, dhe do të ndërtohen pjesërisht nga robotët. Por modelet e godinave do të respektojnë edhe të kaluarën e Japonisë, duke përfshirë teknikat tradicionale të ndërtimit të çative karakteristike.

Teknologjia e zgjuar do të shtrihet edhe brenda shtëpive të banorëve, sipas Bjarke Ingels, studioja e të cilit projektoi gjithashtu edhe Qendrën Botërore të Tregtisë II në Nju Jork, dhe selitë e Google në Londër dhe Silicon Valley.

“Shtëpitë në Woven City, do të shërbejnë si vende testimi për teknologjinë e re, sikurse janë robotët e shtëpisë që do t’i ndihmojnë njerëzit gjatë jetës së përditshme”, tha arkitekti danez. “Këto shtëpi ‘të zgjuara’, do të përfitojnë nga lidhja e plotë me teknologjinë AI të bazuar në sensorë, për t’i bërë gjërat në mënyrë të automatizuar, si zhvendosja e frigoriferit, apo nxjerrja jashtë shtëpisë e mbeturinave, apo madje edhe kujdesi mbi shëndetin”.

Instalimet elektrike dhe objektet e filtrimit të ujit, do të vendosen nën tokë. Në të njëjtën kohë, masterplani i BIG përmban një shesh, parqe dhe sheshe pa makina, teksa Ingels thekson rëndësinë që kanë hapësirat publike në projektin e tij.

“Në një epokë kur teknologjia, media sociale dhe shitja online në internet, po zëvendësojnë dhe eliminojnë vendet tona të takimeve natyrale, Woven City do të eksplorojë mënyrat për të stimuluar ndërveprimin njerëzor në hapësirën urbane”, tha ai.

“Tek e fundit, lidhja njerëzore është lloji i lidhshmërie që shkakton mirëqenie dhe lumturi, produktivitet dhe inovacion”, përfundoi arkitekti. Zbatimi i fazës së parë të projektit, për të cilin BIG tha se do të përbëhet nga më shumë se një duzinë strukturash, do të nisë në vitin 2021. Ndërkohë, nuk ka asnjë date paraprake se kur do të përfundojë ai./ TIRANA TODAY


Kthehu
WhatsApp Denonco ne TT