Topalli, një ndër zërat kundër kreut demokrat Basha, e ka cilësuar atë si një vartës të Ramës. Ish-kryetarja e Kuvendit dhe ish-nënkryetare e PD, Jozefina Topalli, ka deklaruar se shpallja e aleancës me LSI nga Lulzim Basha, nuk është diskutuar kurrë me strukturat e partisë.
Ajo ka pohuar për “Shqiptarja.com” se ka qenë gjithmonë kundër një aleance me një forcë të majtë, ndërsa shtoi se demokratët e kanë paguar një herë shtrenjtë qeverisjen me LSI.
Sipas saj, lidhja e Bashës me LSI mbetet një histori e vjetër miqësie e të parit, dhe se në forumet e PD as nuk është diskutuar ndonjëherë për një aleancë të tillë.
“Lidhja e Lulzim Bashës me LSI është një histori e vjetër miqësie personale e të parit. Në forumet e PD, nuk është diskutuar kurrë një aleancë e tillë.
Lulzimi nuk i njeh forumet dhe as statusin. Siç e din çdokush, ai kurrë nuk i mbledh ata. (Meqë ra fjala, PD është edhe pa statut, sepse kur e votoi në pranverë nuk kishte as kuorum). Unë kam qenë gjithmonë kundër një aleance me një forcë të majtë. Një herë që hymë në qeveri me LSI, e paguam shumë shtrenjtë”.
