Jozefina Topalli, ish-numri dy i PD- së dhe deputete e kësaj partie, gjatë konferencës së perbashkët për shtyp me Arben Imamin, barazoi Bashën me Ramën e Metën, teksa bëri thirrje se është koha për të filluar betejën kundër të treve njëherësh.
Ajo përmendi rezervat që ka pasur ndaj Bashës që ditën e parë që synoi kreun e PD-së.
Duke folur në cilësinë e një prej drejtueseve kryesore të PD për 20 vite, Topalli përshkallëzoi akuzat ndaj Bashës, duke i cilësuar listat e kandidatëve për deputetë si klienteliste dhe familjare.
“Kam pas dyshim prej kohësh, por sot s’kam asnjë dilemë se kjo nuk është PD me të cilën unë jam rritur e kam punuar. PD është sot një parti që e ka marrë në dorë Lulzim Basha për llogari të interesave të familjes së tij. Edhe lista është e familjes Basha dhe bizneseve klientë të tij”.
Gjithashtu, Topalli falendëroi Berishën, ndërsa tha se edhe pse është lënë jashtë parlamentit, ajo do luftojë kundër Ramës, Bashës dhe Metës:
“Do falendroj fort Sali Berishën për të gjithë mundësitë që na ka dhënë. Nuk ecet si do jem unë në pushtet, si do punoj për familjen time. Agjenda personale është një mjerim i madh për këdo që e ka. S’do jem më në parlament, por jam e vendosur të vazhdoj luftën politike kundër Edi Ramës, Lulzim Bashës dhe Ilir Metës.”/ Tirana Today
