Australiani kontrovers i tenisit Nick Kyrgios u tërhoq nga Lojërat Olimpike të Tokios, duke rrëfyer që nuk ishte i motivuar të luante në arena boshe për shkak të koronavirusit. Kyrgios tregoi se kishte probleme të vogla shëndetësore për të cilat do të punonte teksa pushonte larg Lojërave Olimpike.
26-vjeçari shkroi në Twitter: “Është një vendim që nuk e mora me lehtësi. Ka qenë ëndrra ime të përfaqësoja Australinë në Lojërat Olimpike dhe e di që mund të mos e kem kurrë më këtë mundësi. Por unë gjithashtu e njoh veten. Mendimi i të luajturit në stadiume bosh nuk është për mua. Nuk ka qenë kurrë.”
Organizatorët e Lojërave Olimpike kanë ndaluar të gjithë tifozët nga Lojërat, të cilat fillojnë në 23 korrik, mes gjendjes së jashtëzakonshme të vazhdueshme në Tokio për shkak të pandemisë.
Kyrgios shtoi:“Unë gjithashtu nuk do të doja të zija vendin e një atleti të shëndetshëm australian, të gatshëm për të përfaqësuar vendin. Gjithashtu do të marr gjithë kohën që më duhet për të marrë formën e duhur.”
