Një tjetër aksident ajror ka ndodhur sot, pas atij në Rusi dhe në Meksikë. Një avion me rreth 60 pasagjerë është rrëzuar në një zonë malore të Iranit qendror.
Avioni zbriti në malet Zagros pranë qytetit të Semirom në provincën Isfahan, ndërsa fluturonte midis Teheranit dhe qytetit jugperëndimor të Yasuj, raportojnë mediet e huaja.
Mësohet se avioni u zhduk nga radarët rreth 50 minuta pas nisjes.Dëshmitarët thanë për mediet lokale se avioni po përpiqej të bënte një ulje emergjente në një kullotë përpara se të përplasej në malin e Denes.
“Të gjitha forcat e emergjencës janë në gatishmëri. Avioni kishte të paktën 60 pasagjerë”, tha një zëdhënës i shërbimeve emergjente.
Thuhet se moti i keq ka penguar një helikopter të urgjencës që të ulet në zonën ku ka rënë avioni. Nuk dihet ende shkaku i aksidentit ajror dhe as nëse ka viktima. Megjithatë, mendohet se nuk ka të mbijetuar nga rrëzimi i avionit. TIRANA TODAY
