Përkeqësimi i situatës së furnizimit me ujë të pijshëm, si pasojë e uljes së nivelit në rezervuare nga temperaturat e larta, ka detyruar Bashkinë e Tiranës të shpallë gjendjen e emergjencës. Kryebashkiaku, Erion Veliaj thirri sot mbledhjen e Task-Forcës për emergjencën natyrore, duke paralajmëruar kontrolle të përditshme për shmangien abuzimeve me ujin e pijshëm, duke filluar që nga pikat e lavazheve.
Ai u shpreh se ky institucion ka vënë në dispozicion 25 bote me ujë, për furnizimin e zonave ku situata është emergjente, si në Unazën e Re dhe në pjesën perëndimore të Tiranës.
Sipas Veliajt, kriza e ujit prek aktualisht 15%-20% kryeqytetit. Nga kontrollet e bëra, sipas tij, janë konstatuar vjedhje të ujit të pijshëm me anë të mbi 200 prerjeve të tubacioneve, 29 prej të cilave në vijën e transmetimit. Veliaj i bëri thirrje qytetarëve të denoncojnë rastet e abuzimeve, në numrat e emergjencës 112 dhe 128.
