Tirana do të kthehet me një humbje nga Luksemburgu, ku në ndeshjen e turit të parë të Ligës së Kampioneve është mundur nga Dudelanzh vendas. Bardheblutë pësuan disfatë në pjesën e dytë të ndeshjes, kohë në të cilën Limaj u ndëshkua me dy kartonë të verdhë dhe më pas Hasan shënoi pas një përgjumje të prapavijës që i dha mundësinë që të mposhte Bekajn me tentativën e tij me kokë. Ndonëse Tirana e kishte menaxhuar me mjaft sukses ndeshjen, situata ndryshoi shumë shpejt dhe pas golit të pësuar, bardheblutë e patën të vështirë të reagonin, duke krijuar vetëm në fund të sfidës dy mundësi për të barazuar sfidën. Tashmë Tiranës i duhet një përmbysje në ndeshjen e kthimit në javën e ardhshme në “Air Albania”.
FORMACIONET ZYRTARE
Dudelanzh: Foks, Skënderoviç, Da Kosta, Diuf, Kirsh, Gashi, Sinani, Bojiç, Morren, Hasan Nader, Haxhi.
Trajner: Karlos Fangueiro
Tirana: Bekaj, Najdovski, Behiratçe, Toshevski, Ismailgeci, Aleksi, Totre, Limaj, Seferi, Xhixha, Devid.
Trajner: Orges Shehi
Vlen të theksohet se të shumtë kanë qenë tifozët shqiptarë që kanë zgjedhur të udhëtojnë për këtë transfertë. Siç shihet në video, grupi i kampionëve të Shqipërisë, “Tirona Fanatics” kanë krijuar një atmosferë elektrizuese rrugës për në stadium.
