Tirana dhe Vllaznia u përballën në kuadër të Kupës së Shqipërisë në “Selman Stermasi”, ku kryeqytetasit fituan me rezultatin e pastër 2-0. Një “klasike” revanshi për këto skuadra me tradita në futbollin shqiptar, pa harruar edhe finalen e “hidhur” në sezonin e shkuar që solli rrëzimin e Tiranës nga Kategoria Superiore. Bardheblutë të cilët janë dhe kampionët në fuqi, do të kërkojnë triumfin në sfidën e sotme për të hedhur serish kandidaturën për të fituar këtë trofe. Greca dhe Uellison kanë qenë autorët e golave. Ekipi i Ze Marias e filloi me këmbën e mbarë që në minutën e tretë ku arriti të gjente rrugën e rrjetës, por që u anulua nga gjyqtari Alla, pasi Sentamun kishte shkaktuar faull para se të shënonte.
Pjesa e parë u mbyll në rezultatin e bardhë pa gola, por kishte një dominim të dukshëm të Tiranës ndaj ekipit të Gjokës. Fillimi i pjesës së dytë është në të njëjtat ritme, ndërsa në minutën e 69’ Majkëll Ngo tregon vlerat me një kalim të bukur nga e majta dhe jep një pas në qendër të zonës për Grecë, ky i fundit, te pika e bardhë e 11-metërshit e ka pasur shumë të lehtë ta dërgojë topin në rrjetë.
Edhe pas shënimit të golit janë sërish vendasit që sulmojnë dhe i afrohen golit të dytë në minutat e mbetura. Vllaznia duket shumë e dobët për të reaguar dhe në të 83’ minutë pëson edhe golin e dytë. Është Uellison që ka goditur saktë me kokë pas krosimit të Karabecit nga këndi, duke e dërguar topin në cepin e portës.
Tirana – Vllaznia 2-0
Greca, Uellison
Tirana: Lika, Hoxhallari, Uellison, Turtulli, Doka, Maveje, Daja, Karabeci, Sentamu, Celhaka, Greca. Trajner: Ze Maria
Vllaznia: Sherri, Gurishta, Marku, Orelesi, Gocaj, Bardulla, Kalaja, Lika, Vucaj, Krymi, Ribaj. Trajner: Ernest Gjoka
Gjyqtar: Laver Alla
