Është mbajtur sot në Tiranë konferenca rajonale ministeriale me temë “Shërbimet Publike në Ballkanin Perëndimor”, ku përveç Kryeministrit Rama, morën pjesë anëtarë të kabineteve qeveritare nga Shqipëria, Maqedonia, Serbia dhe Mali i Zi.
Sic bën të ditur zyra për shtyp pranë Ministrisë së Inovacionit, në këtë konferencë u prezantuan praktikat më të mira të Bashkimit Evropian në sistemin e dhënies së shërbimeve publike. Vëmendje e veçantë iu kushtua modelit shqiptar të dhënies së shërbimeve publike, duke vendosur kështu standarde të reja në dhënien e shërbimeve publike, duke rritur transparencën, duke ulur praktikat korruptive, duke rritur efiçencën, dhe kënaqësinë e qytetarëve në dhënien e shërbimeve, duke ulur kohën e pritjes, por pa lënë mënjanë dhe sfidat me të cilat është përballur reforma.
Synimi i konferencës ishte të adresoheshin parakushtet e nevojshme për të përmirësuar performancën dhe cilësinë e shërbimeve publike për qytetarët dhe bizneset, të cilat do të sillnin sisteme transparente dhe më të përgjegjshme. Implementimi i Reformës në Adminstratën Publike mbetet një nga prioritetet kyçe për anëtarësimin e vendeve të Ballkanit Perëndimor në Bashkimin Evropian.
Qeveritë e Ballkanit Perëndimor u përfaqësuan në këtë takim nga Milena Harito, Ministër i Shtetit për Inovacionin dhe Administratën Publike,Marta Arsovska Tomovska, Ministër për Shoqërinë e Informacionit dhe Administratën të Maqedonisë, Ana Brnabic, Ministre e Adminstratës Publike dhe Qeverisjes Lokale, Serbi dhe Suzana Pribilovic, Ministre e Adminsitratës Publike të Malit të Zi.
