Pas një viti mungesë, Tirana është kthyer më e ‘etur’ se kurrë në elitën e futbollit shqiptarë. Bardheblutë kanë bërë një merkato të rëndësishme dhe trajneri brazilian, Ze Maria është shprehur se ata do të kërkojnë majën dhe se vendi i dytë nuk pranohet nga tifozët. 24 herë kampionët e Superiores duket se do ta nisin kampionatin pa sulmuesin Ngo’o, por trajneri është shprehur se ekipin e vërtetë do ta shohim pas ndeshjes së tretë, pasi lojtarët kanë nevojë të njihen më mirë me njëri-tjetrin në fushë.
“Miqësorja me Prishtinën ishte një ditë e keqe, pasi ishim të ngarkuar fizikisht. Tani mund të them se jemi gati për Superioren. Duhet të përpiqemi të fitojmë dhe nëse duam ta bëjmë këtë, atëherë duhet të mendojmë se çfarë duhet të bëjmë në fushë. Kamza ka ndryshuar, por ne merremi me veten tonë. Duhet të tregojmë forcë dhe dëshirë. E rëndësishme është të luftosh, sepse njerëzit këtu nuk e pranojnë vendin e dytë, Duhet të luftojmë dhe të mendojmë vetëm se çfarë duhet të bëjmë ne”, tha trajneri brazilian i bardhebluve.
“Është shpejt të flasim për objektiva, pasi jemi vetëm në fillim të sezonit, Do të përpiqemi të luftojmë në maksimum dhe këtë ua premtoj edhe tifozëve. Nuk dua të flas para kohe, sepse nuk dua që të luajnë me mua, nëse nuk ia dalim të shpallemi kampionë. Do të kërkojmë të fitojmë çdo ndeshje, pavarësisht vështirësive. Klubi më ka dhënë lojtarë me kualitet, por ata duan kohë të përshtaten. Doja një sulmues pasi Ngo’o nuk është gati, Pas ndeshjes së tretë do të shihni Tiranën e vërtetë, ndërsa për momentin më duhen pikët dhe jo loja”, deklaroi Ze Maria.
