Sekretari amerikan i Shtetit, Rex Tillerson, ka deklaruar se “nuk ka pothuajse fare besim” midis SHBA-së dhe Rusisë.
Tilleson i bëri këto komente për stafin në Departamentin e Shtetit në Uashington, kur po prezantonte të ardhmen e këtij institucioni nën presidentin Donald Trump dhe përballë reduktimeve të mundshme të buxhetit të tij.
“Po bëjmë disa përpjekje për të stabilizuar fillimisht marrëdhëniet midis SHBA-së dhe Rusisë. Ushtruesi i detyrës së zëvendëssekretarit të Shtetit, Thomas Shannon, është duke udhëhequr përpjekjet e një grupi punues, për të parë nëse mund t’i adresojmë disa gjëra që irritojnë marrëdhëniet, që na e bëjnë të vështirë të bisedojmë me njëri-tjetrin”, tha Tillerson.
Ai tha se planifikon të diskutojë për bashkëpunim në zgjidhjen e konfliktit në Siri me homologun e tij rus, Sergei Lavrov, në një mbledhje të Këshillit Arktik në Alaskë, më 10-11 maj.
Tillerson, po ashtu, tha se SHBA është duke përgatitur sanksione të reja kundër Koresë së Veriut, në përgjigje të programit të vazhdueshëm bërthamor të Penianit.
