Lionel Messi është udhëheqësi i Argjentinë në këtë Botërorë dhe të gjithë i kanë kthyer sytë nga ai, pasi vetëm një formë e lartë e tij mund të sjellë Kupën e Botës në Argjentinë. Por ylli i Barcelonës nuk mendon kështu, ai është shprehur se janë një kombëtare e mirë, por nuk janë favoritët e këtij kompeticioni. Në një farë mënyre Messi përpiqet të ulë me këmbë në tokë tifozët, të cilët e mbështetën ekipin me shumë dashuri dhe jo si herët e tjera kur e kishin fërshëllyer.
Nënkampionia e Botës në fuqi, që doli e dyta në Botërorin e Brazilit, para katër viteve, Argjentina, i shtoi përgatitjet e saj për turneun e Rusisë, që starton muajin e ardhshëm, me një fitore rutinë prej 4-0, në Buenos Aires, të martën ndaj Haitit. Ku kapiteni i “albiceleste” shënoi tre gola dhe asistoi për Agueron. Ata do të kenë edhe një miqësore tjetër më 7 qershor përballë Izaraelit, para se të shkojë kokë më kokë me Islandën, Kroacinë dhe Nigerinë në Grupin D të Kupës së Botës, ku kampionët kryesorë: Gjermania, Brazili, Franca dhe Spanja, janë ndër favoritët.
“Unë jam shumë mirënjohës për të gjithë njerëzit, kemi ndier gjithmonë mbështetjen e të gjithëve, jo si herë të tjera, që kemi marrë fyerje, – tha Messi, i cili me kombëtaren ka shënuar 64 gola. Ne të gjithë shkojmë në Rusi për të njëjtën arsye, fitimin e Kupës së Botës. Kjo është ëndrra jonë, e vendit që përfaqësojmë. Ne nuk jemi favoritë, por jemi shumë të mirë. Po stërvitemi dhe përmirësohemi dita-ditës. Kemi lojtarë të mirë dhe po bëhemi më të fortë, për të luftuar si të barabartë me të gjithë”.
Pesë herë fituesi i “Topit të Artë” shtoi më tej: “Në një Kupë Bote, logjika thuajse nuk materializohet kurrë. Ne duhet të synojmë të fitojmë ndeshjen e parë, e cila është më e rëndësishmja, sepse do të na japë paqe mendore. Askush të mos ketë dyshime se do të provojmë gjithçka, siç na pyesin gjithmonë njerëzit. Ne po shkojmë me një skuadër të madhe, që po bëhet e fortë edhe në nivel individual. Po përballemi me një mundësi të bukur dhe do të kërkojmë maksimumin”.
