Theresa May ka dhënë fjalimin e saj të fundit si kryeministre e Britanisë, post nga i cili dha dorëheqjen pasi nuk mund të merrte miratimin e parlamentit britanik për daljen nga BE-ja.
Ndërkohë, 1 ditë më parë u zgjodh se kush do jetë pasuesi i saj, pikërisht kryetari i ri i Partisë Konservatore, Boris Johnson. Ajo e ka uruar kryeministrin dhe qeverinë e re duke thënë se “suksesi i tyre do të jetë edhe sukses i shtetit tonë”.
Sipas mediave britanike, May tani është nisur drejt Pallatit Buckingham për të dhënë formalisht dorëheqjen para Mbretëreshës Elizabetë. Theresa May, deklaroi në datën 7 qershor se do të largohej nga pozita e lideres së Partisë Konservatore në Britani, duke i hapur rrugën procesit të zgjedhjes së kryeministrit të ri.
May është përballur me presion të madh nga partia e saj për t’u larguar nga pozita që ka, pasi plani i saj për largim të Britanisë nga Bashkimi Evropian ka dështuar të miratohet në Parlamentin britanik.
Vendimi për Brexit ka ardhur pasi 52 për qind e votuesve kanë votuar për dalje të Britanisë nga BE-ja kundruall 48 për qind që kanë kundërshtuar atë, në referendumin e mbajtur më 2016.
