Pas kontrolleve që janë ushtruar në shtëpitë e gjyqtarëve të çështjes Dajti, në banesën e njërit prej tyre, Skënder Damini, janë gjetur para, (rreth 20 mijë euro), armë dhe municione. Banesa e tij ndodhet në zonën e Freskut në Tiranë, ndërsa operacioni është shtrirë në disa qytete të vendit. Gjyqtari Damini është shoqëruar drejt policisë vendore të Tiranës, së bashku me avokatin e tij Arjan Ndoji.
Burimet, ende jo zyrtare bëjnë me dije se gjyqtari ka qenë në banesën e tij në Tiranë, kur policia në një aksion blic kreu kontrolle në apartamentin e tij në zonën e Liqenit në kryeqytet.
Ai ka thirrur avokatin, me të cilit ka dalë nga shtëpia për t’ju drejtuar Policisë së Tiranës. Aty Skënder Damini do të merret në pyetje, pasi Prokuroria për Krime të Rënda nisi procedimin penal ndaj tij për korrupsion aktiv të gjyqtarit. Bashkë me të, në hetim u vunë edhe dy kolegët, Petrit Aliaj dhe Aleks Nikolli, të cilët shpëtuan nga burgimi i përjetshëm Dritan Dajtin, autorin e vrasjes së 4 efektivëve të policisë në vitin 2009 në Durrës.
Ata pranuan kërkesën e Dajtit për gjykim të shkurtuar, që rrjedhimisht e shpëton atë nga burgimi i përjetshëm.
Gjyqtari tashmë do të japë versionin e tij në Policinë e Tiranës, ndërsa avokati Arjan Ndoj në një prononcim të shkurtër për gazetarët e vendosur jashtë shtëpisë, tha se nuk ka asnjë masë sigurie ndaj gjyqtarit.
Armë në banesë, gjyqtari i Dritan Dajtit përfundon në polici
