Thellohet drama e 11-vjeçares në Kosovë, ku bëhet me dije se janë arrestuar gjashtë persona të tjerë që dyshohet se kanë abuzuar seksualisht me të.
Prokuroria Themelore në Prishtinë, Departamenti për të Mitur njofton se në koordinim me Policinë e Kosovës, dje kanë arrestuar gjashtë persona të dyshuar. Gjashtë personat dyshohet se janë përfshirë në veprimtari penale, si të dyshuar për kryerjen e veprave penale “Trafikimi me njerëz”, ”Shërbimet seksuale të viktimës së trafikimit” dhe “Dhunimi’”.
Në bazë të provave dhe dëshmive të siguruara deri më tani, nga hetimet e zhvilluara, dyshohet se janë të përfshirë në rastin e qershorit, ku e mitura ishte raportuar si person i zhdukur.
“Sigurojmë opinionin publik se për të dy çështjet penale ku e përfshirë është viktima e mitur, prokuroria në koordinim me institucionet e tjera relevante, ka ndërmarrë të gjitha veprimet e nevojshme hetimore me profesionalizëm e përgjegjësi dhe po vazhdon me ndërmarrjen e veprimeve hetimore tutje”, thuhet në njoftim.
Po ashtu, në cilësi të provave materiale janë konfiskuar shtatë telefona celularë, që do të shërbejnë në procedurë penale.
Ngjarja ka ndodhur javën e kaluar, ku u raportua se një 11 vjeçare është abuzuar nga pesë persona. Personat e dyshuar janë arrestuar nga policia, dhe ndodhen në paraburgim.
