Kreu i Agjencisë Shtetërore të Kadastrës, Artan Lame, ka bërë një deklaratë të fortë, duke paralajmëruar arrestime. Ai ka thënë se shumë shpejt në Tiranë do ketë arrestime të vartësve të tij, njëjtë siç ndodhi në Kadastrën e Durrësit.
“Së shpejti do të dëgjojmë edhe për Tiranën, si në rastin e asaj që ka ndodhur në Kadastrën e Durrësit, pasi ka patur mbivendosje të pronës. Te Kadastra nuk do ndodhë asnjë ndryshim, se ne e kemi prej dy vitesh këtë. Vetëm në institucione të tjera do të ketë këto ndryshime nga 1 maji”, tha Lame në emisionin “Opinion”.
Ditë më parë, Lame tha se nga të gjitha dosjet e marra nga Kadastra e Durrësit, vetëm 15 % e tyre janë pa probleme, ndërsa pjesa tjetër e regjistrave kanë rezultuar me faqe që mungojnë, të grisura madje edhe shumë të dubluara që tregojnë se për një pasuri janë ndjekur dy rrugë të ndryshme legalizimi apo kthimi te pronari duke sjellë abuzime shumë të mëdha.
Shkrirja e Kadastrës së Durrësit dhe nisja e hetimeve të thelluara për abuzimet që janë bërë atje në 32 vite, kanë nxjerrë një raport me shkeljet e detajuara që janë zhvilluar. Në një raport 600 faqesh u vunë re se abuzimet janë përtej imagjinatës dhe zonat ku janë kryer paligjshmërisë dhe plaçkitjet më të mëdha janë ato bregdetare të Durrësit si Plazh, Spitallë, Lalëz, Draç, Rodon, etj.
