Moderatorja e njohur Sonila Meço publikoi ditën e djeshme, disa foto nga oborri i shtëpisë së saj në fshatin turistik në Dardhë, Korçë, ku po kalon disa ditë pushimi me familjen.
Nga pamjet e postuara, vihej re që banesa e gazetares i ishte përshtatur arkitekturës së zonës, pasi fasada e saj ishte punuar me gurë.
Mirëpo kjo gjë tërhoqi vëmendjen e mediave online, të cilat e quajtën “vilë luksoze” banesën e saj, gjë e cila mesa duket nuk i ka pëlqyer Sonilës.
Ajo ka reaguar përmes një statusi në Facebook, ku shprehet se i është kthyer fshatit e tokës, kur shumë të tjerë nuk i ndaheshin qytetit. Moderatorja shprehet se ka marrë komente të rënda pas fotove që postoi teksa sqaron se është një shtëpi e trashëguar nga paraardhësit e bashkëshortit të saj.
Statusi i Sonila Meços:
Për ca tituj portalesh e komente nëpër to
Nuk ka asnjë lajm tjetër në fotot prej bahçeve të Dardhës…aty ku fati e desh të rriteshin të parët e bashkëshortit tim e ku stërmbesa e tyre po për të njëjtin fat kalon pushime verore e dimërore.
Se ndonjëherë portalet, edhe pse prej dashamirësisë, me titujt e tyre nxisin komente nga më të rëndat.
Ne i jemi kthyer fshatit e tokës kur shumë të tjerë nuk i ndaheshin dot qytetit. Ky është i vetmi luks, kush kalon nga Dardha e di se si i stolisin bahçet me lule të harlisura banorët e përhershëm e të përkohshëm. Rrofshin për traditën!
Ju presim për ditën e Shën Mërisë në 16 gusht, Dardha është pasuri për këdo që shkel në të.
