Presidenti i Kosovës, Hashim Thaçi ka thënë pas takimit konsultues me koalicionin PAN dhe minoritetet jo serbe, se seanca konstituive e kuvendit do të thirret shumë shpejt.
Ai tha se janë ende brenda afateve të rregullta për caktim të seancës konstituive, por shtoi se është e nevojshme të lëvizet përpara dhe të fillojnë përgatitjet për seancën e parë të kuvendit.
Thaçi njoftoi se kjo do të bëhet në koordinim me sekretariatin e kuvendit dhe brenda afateve kushtetuese.
“Në përputhje me kompetencat e mia, shumë shpejt do të shpallim datën e mbajtjes së seancës konstituive të kuvendit të Kosovës. Kjo do të ndodhë në konsultim me sekretariatin e kuvendit dhe në koordinim me afatet kushtetuese. Seanca do të thirret shumë shpejt”, ka thënë presidenti Thaçi.
