Presidenti i Kosovës, Hashim Thaçi ka shpallur zgjedhje të jashtëzakonshme për kryetar në katër komunat e banuara me shumicë serbe në veri të Kosovës.
Konkretisht, zgjedhjet do të mbahen më 19 maj, në komunat Mitrovicë e Veriut, Zubin Potok, Leposaviq dhe Zveçan.
Vendimi erdhi pasi më 27 nëntor 2018, katër kryetarët e këtyre komunave dhanë dorëheqjen, duke kundërshtuar vendimin e Qeverisë së Kosovës për vendosjen e taksës 100% ndaj prodhimeve të importuara nga Serbia.
Në deklaratën e përbashkët, ish-kryetari i Zubin Potokut, Stevan Vuloviq, i Zveçanit, Vuçina Jankoviq, i Leposaviqit, Zoran Todiq dhe i Mitrovicës Veriore, Goran Rakiq, kanë thënë se me këtë taksë, “serbëve të Kosovës u është kërcënuar e drejta për jetesë, shërim dhe mbijetesë”.
