Përmes një konference për mediat në samitin e liderëve rajonalë e europianë në Alpbach të Austrisë, presidenti i Kosovës, Hashim Thaçi, ka deklaruar se korrigjimi i kufijve nuk e destabilizon rajonin.
Duke qetësuar ‘gjakrat’ dhe tensionet që janë krijuar së fundmi, ai ka konfirmuar se marrëveshja mes Kosovës dhe Serbisë, nuk duhet te frikësojë askënd e as korrigjimi i kufijve.
“Në këtë aspekt ne kemi vështirësi në procesin e normalizmit ndërmjet Kosovës dhe Serbisë. Jemi në fazën finale të procesit, dhe kemi nevojë për mbështetjen e BE-së dhe SHBA-së dhe nga shtetet e tjera, që të arrijmë një marrëveshje finale ndërmjet Kosovës dhe Serbisë.
Pa këtë marrëveshje, asnjëri shtet nuk do të bëj progres në rrugën drejt BE-së. Benifitet nëse arrihet marrëveshja janë të mëdha, jo vetëm për Kosovën dhe Serbinë, por edhe për BE-në”, ka deklaruar ai.
Duke qendruar në të njëjtën linjë, Thaçi tha se një marrëveshje e tillë do të garantonte paqe.
“Kemi vendosur që të arrijmë një zgjidhje kreative, dhe të pranueshme nga të gjithë. Jemi të bindur se kjo do të garantonte stabilitet dhe paqe në Ballkanin Perëndimor. Kosova dhe Serbia nuk do të jenë shtetet e vetme që të korrigjojnë kufijtë”, tha Thaçi.
