Presidenti i Kosovës, Hashim Thaçi është takuar me zyrtarë të lartë, gjatë vizitës së tij në SHBA, në kuadër të seancës së Asamblesë së Përgjithshme të Kombeve të Bashkuara.
Thaçi u takua edhe me homologun e tij e serb, Vuçiç, pas një takimi të organizuar nga Shefja e Politikës së Jashtme e Bashkimit Evropian, Federica Mogherini.
Sipas një njoftimi të publikuar nga zyra e informimit e Mogherinit, dy presidentët kanë diskutuar për fazën e re të dialogut mes Beogradit e Prishtinës, i cili ndërmjetësohet nga Bashkimi Europian.
“Ata vazhduan diskutimet për fazën e re të dialogut midis Beogradit dhe Prishtinës, të ndërmjetësuar nga BE-ja, për normalizimin e plotë të marrëdhënieve.
Ata gjithashtu shqyrtuan përparimin e bërë në zbatimin e Marrëveshjes për Drejtësinë, e cila do të hyjë në fuqi plotësisht më 17 tetor, siç është rënë dakord në takimin e tyre të fundit”, thuhet ndër të tjera në këtë njoftim.
Mogherini ka përshëndetur takimin e tyre duke rikujtuar se përparimi i të dyja vendeve në agjendën e integrimit në Bashkimin Europian, lidhet me arritjet në dialog, ndërsa ka shprehur edhe mbështetjen e saj në normalizimin e marrëdhënieve Kosovë- Serbi.
