Haki Çako ka raportuar dje para Komisionit të Sigurisë Kombëtare në cilësinë e kryetarit të Emergjencave Civile. Ai ka konfirmuar para komisionit se janë duke u rindërtuar 233 banesa të cilat u prekën nga tërmeti i 21 shtatorit. Sipas tij, kryesisht janë fokusuar në bashkitë, Durrës, Shijak, Rrogozhinë, Krujë, Kavajë, Kamëz.
Nga ana tjetër, Bashkia e Tiranës ka marrë përsipër të rindërtojë vetë një pjesë të ndërtesave të dëmtuara në qytetit. Përpos pyetjeve të shpeshta, Çako nuk arriti të jepte një shifër të saktë mbi vlerën e dëmeve të tërmetit.
“Ka filluar puna për rindërtimin e 233 banesave në bashkitë Durrës, Shijak, Krujë, Rrogozhinë, Kavajë, Kamëz ashtu sikurse një pjesë Bashkia e Tiranës ka marrë përsipër dhe ka filluar t’i bëjë. Vlera totale e dëmit lidhet ngushtësisht me administrimin në total të dosjeve që do duhet të vëmë në dispozicion të Agjencisë Kombëtare. Për momentin nuk mund të jap dot një vlerë të saktë”, tha Çako.
Për të me tepër ai ka folur për problemet financiare që has institucioni i tij. “Në këtë kuadër, me lejoni të theksoj dhe t’ju bëj me dije se qeveria shqiptare, në tërësinë e investimeve për vitin 2019 ka rreth 1 miliard lekë.
Ne shpresojmë dhe urojmë që 2020 të karakterizohet me sa më pak fatkeqësi që do na mundësojë të kompensojmë barrën e detyrimeve të mbetura. Të gjitha dosjet, i gjithë dokumentacioni përkatës për të gjitha fatkeqësitë, janë të identifikuara, të administruara dhe sipas mundësisë financiare do bëhet dhe trajtimi”, tha Çako.
