Një tërmet i fuqishëm ka vrarë një mijë njerëz dhe ka lënë qindra të tjerë të plagosur në Afganistan, ka thënë një zyrtar taleban për “BBC”. Ky është tërmeti më vdekjeprurës që ka goditur Afganistanin në dy dekada.
Kreu i informacionit për provincën Paktika, Mohammad Amin Hazifi, tha për “BBC” se 1000 njerëz kishin vdekur dhe 1500 të tjerë janë plagosur.
Ekipet e shpëtimit janë ende në kërkim të të tjerëve që janë nën tokë, shtoi ai.
Tërmeti goditi rreth 44 km (27 milje) nga qyteti juglindor i Khost, pak pas orës 01:30 me orën lokale (21:00 të martën GMT), kur shumë njerëz ishin në gjumë në shtëpi.
“Çdo rrugë që shkoni, dëgjoni njerëz që vajtojnë vdekjen e të dashurve të tyre. Shtëpitë janë të rrënuara”, tha një gazetar lokal në provincën Paktika.
Tërmetet priren të shkaktojnë dëme të konsiderueshme në Afganistan, ku banesat në shumë zona rurale janë të paqëndrueshme ose të ndërtuara keq.
Komunikimi pas tërmetit është i vështirë, për shkak të dëmtimit të kullave të telefonisë celulare dhe numri i të vdekurve mund të rritet edhe më tej, tha një tjetër gazetar lokal në zonë për “BBC”.
“Shumë njerëz nuk janë të vetëdijshëm për mirëqenien e të afërmve të tyre, sepse telefonat e tyre nuk funksionojnë”, tha ai. “Vëllai im dhe familja e tij vdiqën dhe unë sapo e mësova pas shumë orësh. Shumë fshatra janë shkatërruar”.
Burimi i lajmit: BBC. Përshtatur nga Tirana Today
