Një tërmet i fuqishëm tronditi Shqipërinë e mesme në orën 11 të kësaj të mërkure. Sipas të dhënave të publikuara nga Instituti i Gjeoshkencës tërmeti ishte 6 ballë me magnitudë 5.1 të shkallës Rihter.
Epiqendra e tij ka qenë në afërsi të Hamallajt në Gjirin e Lalzit në Durrës në një thellësi prej 2 kilometrash. Pas lëkundjes së parë ka pasur brenda pak minutash edhe një të dytë me magnitudë më të ulët. Lëkundjet janë ndjerë në Tiranë, Durrës, Fier e deri në Vlorë. Në kryeqytet seria e tyre ka zgjatur për disa sekonda.
Në kryesinë e Kuvendit janë ndërprerë punimet e komisioneve parlamentare. Ishin të shumtë ata që dolën jashtë banesave apo vendeve të punës. Paraprakisht nuk raportohen persona të lënduar apo dëme të shkaktuara.
Lëkundjet janë ndjerë deri në Kosovë. Kryebashkiaku i Tiranës u bëri thirrje banorëve të lënë banesat deri në sqarimin e situatës.
Mediat italiane shkruajnë se tërmeti kishte përfshirë një territor edhe më të gjerë ku lëkundjet janë ndjerë nga Mali i Zi e deri në bregdetin e Pulias. Në veçanti, tërmeti ka shkaktuar panik edhe në Leçes, Monopolit dhe Brindisit, por tronditja u ndje edhe në Bari.
