Nëse menduat se nuk do të ketë më tërmete, këtu gaboheni. Ekspertët japin shenjat për tronditje të radhës në vendin tonë. Sot është shënuar lëkundja e 932-të brenda 1 muaji.
Tërmeti u ndje thuajse në të gjithe Ballkanin. Lëkundja e 932 është regjistruar në orën 17:40 të kësaj të shtune, në zonën e Bulqizës, që sipas sizmiologëve është i ngjashëm me atë të vitit 2017, në po të njëjtën shtrirje. Sizmologu i Institutit të Gjeoshkencave, Edmond Dushi, është shprehur se tërmeti është ndjerë fort lokalisht, për shkak të thellësisë.
“Epiqendra është në veri të Bulqizës, magnituda është 5.1, paksa më e ulët se ajo e 4 korrikut, por ndjeshmëria gjithmonë favorizohet nga kushtet tektonike të tërmetit, pra nga thyerja tipike që gjeneron tërmeti.
Tërmeti është ndjerë fort lokalisht për shkak të thellësisë, ka pasur një thellësi prej 23 km dhe kjo ka bërë që tërmeti të ndjehet gjerësisht, edhe jashtë kufirit si në Maqedoni dhe Mal të Zi, sipas të dhënave që disponojmë paraprakisht”, ka thënë ai për ‘Top Channel”.
“Tërmeti ishte unik, por është pasuar nga pasgoditje dhe është normale që tërmetet të cilat e kalojnë magnitudën 5, pritet të kenë goditje të menjëhershme”, shton Dushi.
Sipas sizmiologut, lëkundjet sizmike do të vazhdojnë: “Mendoj që do të ketë pasgoditje të tjera, nuk mund të them se sa do të jetë intesiteti i tyre, dmth a do të jetë njësoj me atë të Gjirit të Lalzit, apo do të jetë me një ritëm më të ulët, por që pasgoditje do të ketë”.
