Vijon megaoperacioni për arrestimet e personave që dyshohet se kanë shkelur detyrën sa i takon ndërtimeve të pallateve që janë prekur nga tërmeti i rëndë që goditi Shqipërinë më 26 nëntor.
Ka qënë vetë organi i akuzës që ka zbardhur detaje të këtij operacioni ku deri më tani janë arrestuar 31 zyrtarë dhe ish-zyrtarë si dhe ndërtues.
Sipas Prokurorisë, këto persona janë përgjegjës për ndërtimin jo sipas kritereve çka ka sjellë pasoja të rënda nga tërmeti.
“Prokuroria e Tiranës më 27 nëntor ka filluar hetimin pas tërmetit, duke u munduar të nxjerrë në pah shkeljet e punonjësve të administratës, por edhe ndërtuesit, që sollën si pasojë nxjerrjen e disa banesave të pabanueshme.
Janë evidentuar 25 institucione, 125 pallate dhe 200 banesa të dëmtuara në Qarkun e Tiranës nga tërmeti i 26 nëntorit. Është arritur në konkluzionin se janë evidentuar dhe identifikuar autorët, që u bënë shkak e pasojë për arrestimet e djeshme, numri i të cilëve ka arritur në 31”, tha prokurorja Elisabeta Imeraj.
